هيدا كان عنوان مخيّمنا، المخيّم يلّي تضمّن 38 شبّ وصبيّة، إلتقوا بـ" دير سيّدة النجاة - بكفيّا" من الأربعاء 24 تموز إلى الأحد 28 تموز 2013، بإشتياق وحماس ليختبروا أجمل إيام مع باقة من المسؤولين...
أوّل خطوة بمسيرتنا تضمنت التعرّف على حقيقة مواصفات الشخص يلّلي بدنا نسلمو ذاتنا ونقلّو بثقة "أنا أقبل". من خلال المواضيع اللي ناقشناها، تأكّد كل شخص منّا من ضرورة وجود هالعلاقة المبنيّة عالإيمان بحياتنا.
ومع مرور الوقت، اكتشفنا دورنا الفعّال بهالحياة، ووجودنا اللي ما كان صدفة واللي ما لازم نغضّ النظر عليه لأننا ولو كنّا نقطة ببحر ربنا، بلا هالنقطة البحر ناقص نقطة...
وهون وصلنا على المغزى الحقيقي لمخيّمنا، يلّي من خلال عدّة مراحل وتأملات فرديّة وجماعيّة، تجسّد سرّ التوبة بيناتنا.
من بعد ما قطعنا كافّة المراحل، وفكّرنا إنّو خلصت سهرتنا، تفاجأنا بتحوّل أول ثواني من فجرنا الجديد لأول ثواني من عمرنا الجديد اللي إفتتحناه بأصدق عرس وأجمل علاقة يلّي تمت بإعلان وعد أبدي من كل فرد منّا ليسوع، واستحقينا فعلاً عنوان المخيّم!
