أمل، بسمة، فرح ومحبّة،
هيك بلّشنا نهارنا، جمّعنا بعِضنا مسؤولين وأولاد المنظمات بساحة الرعيّة تننطلق برحلتنا.
من بعد تقسيم الفرق، انطلق الباص الساعة السابعة ونصف صباحًا باتجاه سيدة مزيارة، وبس وصلنا تعرّفنا أكتر على مراحل حياة السيّد المسيح من خلال التماثيل لي بتجسّدلنا ياها. كما وإنّو كلّلنا نهارنا بالذبيحة الإلهيّة.
حان وقت الغذاء وهون بدنا نشكر أخويّة مزيارة على حسن استقبالهن إلنا، تغدّينا، لعبنا وتسلّينا.
ومن بعدها زرنا سيدة النوريّة يلّي بطريقها الطويل خلّتنا نتحمّس لنكتشف ونتعرّف شو مخبيلنا هالدرج الطويل بآخرو. وبس وصلنا اندهشنا بهالكنيسة القديمة لي بتحسِّسَك بالصلاة والخشوع. ومحطّتنا الأخيرة كانت بحديقة الحيوانات يلّي فيها تعرّفنا على أشكال وأسماء حيوانات جديدة وهونيك كان ختام رحلتنا ومن بعدها رجعنا على الرعيّة حاملين معنا أخبار وزوادات لأهلنا من هالنهار الحلو. وبالنهاية بدنا نشكر كل شخص قدّم مساعدتو إلنا وكما وإنّو بدنا نشكر الأهل لي حطّو ثقتن بالرعيّة رغم وضع البلد وبيبقى الشكر الكبير لربنا لي رافقنا كلّ هالنهار.
